კრაკოვი იაფი ქალქია, ყველაზე ტურისტულ ადგილებშიც კი, მაგალითად საკვებზე, ქართველი მოგზაურისთვისაც ხელმისაწვდომი ფასებია.
ამ საყოველთაო სიიაფის მიუხედავად ტურისტების დიდი რაოდენობა მაინც ეტანება ყველაზე იაფ რესტორანს Bar Mleczny “Pod Temidą” (რძის ბარი “თემიდას ქვემოთ”).
რესტორანი საბჭოთა სასადილოს მოგაგონებთ, მაგრამ მხოლოდ ინტერიერით და მომსახურების პრინციპით. კერძები კი სიიაფის მიუხედავად უახლესი პროდუქტებისგანაა დამზადებული და ძალიან გემრიელია. სწორედ ამიტომ იქ თითქმის ყოველთვის გრძელი რიგი დგას.
მენიუ დიდი აბრების სახით შესასვლელშივეა გამოკრული. მისი გადაღება მხოლოდ გვიან საღამოს შევძელი, როდესაც რესტორანი დაცარიელდა.
აქ თავდაპირველად დავაგემოვნე გემრიელი პოლონური სუპი “ჟურეკი” (ძეხვით, კვერცხითა და კარტოფილით) – ფასი 4.5 ზლოტი, ანუ 3 ლარი.
რესტორნის მრავალფეროვან მენიუში ყველაზე ძვირიანი კერძი 16.50 ზლოტი, შესაბამისად 11 ლარი ღირს. შემდეგ ფოტოზე ორი ადამიანისთვის განკუთვნილ საკვებში 24 ლარი გადავიხადე.
ეს სასადილოს ტიპის დაწესებულება, რომელსაც რძის ბარი ჰქვია, იმითაც არის კარგი, რომ არ გიწევს კერძების ლოდინი და თუ რიგი არ შეგაწუხებს პირდაპირ მიიღებთ მენიუში ამორჩეულ, ახლადმომზადებულ, ცხელ-ცხელ კერძებს.
ერთად-ერთი რაც შეიძლება ყველაზე შემაწუხებლად გამოიყურებოდეს არის “ბომჟებთან” შეხვედრის ალბათობა, რომლებიც იაფ საკვებს და ნარჩენებს ეტანებიან. ასევე სასადილოში არ არის ალკოჰოლური სასმელები და დროსსატარებლად არ გამოდგება, თუმცა კი საღამოს ამ ყვავილებიან ფანჯარასთან ჩამოჯდომა მაინც შეიძლება.
სასადილოს სიიაფის მთავარი საიდუმლო სამთავრობო სუბსიდირებაშია. პოლონეთის მთავრობა მსგავს ხელმისაწვდომ რესტორნებს რამდენიმე დიდ ქალაქში აფინანსებს.
Bar Mleczny “Pod Temidą” – რძის ბარის პოვნა იოლია -კრაკოვში ცენტრალური “ბაზრის მოედნიდან” უნდა გაუყვეთ იმ ქუჩას როემლზეც მდებარეობს ქართული რესტორანი, ცოტა მოშორებით კი ამ იაფფასიან სასადილოსაც წააწყდებით.
განახლება 30 აპრილი 2018
კრაკოვში ამ უკანასკნელი ვიზიტისას მსგავსი ოჯახური სამზარეულოს სასადილო ვიპოვე, რომელიც გაცილებით არატურისტული, უფრო ახალი და ოდნავ იაფიც აღმოჩნდა.
ეს ლანჩ-ბარი მდებარეობს ავტოსადგურთან და რკინიგზის ვაგზალთან ახლოს, დაახლოებით 3 წუთის მანძილზე. მის პოვნას გაგიადგილებთ გუგლის რუკა: https://goo.gl/maps/AP6kupKBVHJ2
თუ კრაკოვში მოგზაურობას გადაწყვეტთ, შეგიძლიათ დაბალფასიანი სასტუმროებიც მოიძიოთ hotelscombined.com
ან კიდევ შეგიძლიათ Airbnb-ზე ჩემგან დარეგისტრირდეთ და დაჯავშნოთ აპარტამენტი 35 ევროს ფასდაკლებით.